ليه دايما بنقول Organic Search؟ يعني ايه اورجانيك سيرش اصلا؟ ليه مانعتمدش على الأسهل وهي زيارات فيسبوك من الجروبات المليونية او الحملات الممولة وإلى آخره؟! يعني ايه باونس ريت او معدل ارتداد وازاي أقلل منه؟ يعني ايه المحتوى هو الملك؟
ببساطة يا صديقي هي مجرد معادلة سهله في قرايتها بس تنفيذها هو اللي صعب، مش مستحيل، بس عايز تركيز واستمرار وشوية فهم لبعض الأمور.
اولا كلمة اورجانيك سيرش معناها ان كل الزوار اللي جايين موقعك من محركات البحث بس، واحد فتح جوجل او ياهو او بينج وكان بيدور على حاجة وموقعك طلع اول او تاني او تالت نتيجة، او اول صفحة بشكل عام، وعلى اساس كدة دخل موقعك وعلى أساس الوقت اللي قضاه في قراية موضوعك + هل رجع محرك البحث وكمل فيه ولا وصل للي هو عايزه في موقعك فعلا؟
وهنا يظهر دور كلمة المحتوى هو الملك، ودي معناها انه ملك كل الحركات اللي كلنا بنحاول نتعلمها من الجروب ده زي السيو بكل فروعه والباكلينك وال PBN وما إلى ذلك.
لو صادف في مرة "بطريقة ما" وصلت لأول او تاني نتيجة في موضوع معين في موقعك وطبعا هتلاحظ زيادة الزوار للموضوع ده بالذات لفترة من الوقت، وبعدين عدى اسبوعين مثلا ولقيت الموضوع مابقاش يجيب زيارات زي الأول! ده يا صديقي صنايعي المحتوى بسبب البتاعة الرخمة اللي اسمها Bounce Rate - ودي معناها معدل ارتداد الزوار اللي دخلوا اول نتيجة اللي هي موقعك ولقوك "بتعك" او كاتب اي "هجص" وحظك كان حلو في انك تتصدر النتايج الأولى بس نتيجة لكدة ان الزائر بيسيب موقعك ويرجع جوجل و يدور على نفس الكلمة تاني ويدخل نتيجة تانية ومن هنا جوجل بيرميك في الصفحة الخامسة او السادسة!
وهنا يظهر دول حاجة اسمها Internal Linking - ودي معناها انك تربط من مواضيع موقعك ببعضها من خلال المواضيع اللي في نفس مجال موضوعك المتصدر - ومن هنا برضه بنقول ان المجال او النيتش الواحد افضل 100 مرة من الموقع العام او الخلطبيطة ونتيجة لكدة هتشد الزائر انه يشوف مواضيعك التانية بتتكلم عن ايه بما ان ده اصلا اهتمامه وبالتالي مش هيسيب موقعك ويمشي بسرعة ومن هنا بأبسط الطرق هتقلل نسبة ارتداد الزوار من الموقع، خليك زي البايع الشاطر وحافظ على الزبون جوة المحل قدر الإمكان مايمشيش غير اما يشتري.
